Беларуская мастачка і архітэктарка з нікам h_kaspiarovich апублікавала ў Threads праект інтэр’еру ў сучасным беларускім стылі. Усяго за суткі яе пост набраў больш за 1500 лайкаў і каля 130 каментарыяў. У каментарыях многія карыстальнікі пішуць, што такі падыход ім вельмі падабаецца, – у тым ліку і замежнікі. CityDog.io расказвае падрабязнасці.
Як выглядае інтэр’ер у сучасным беларускім стылі?
У сваім допісе аўтарка прапанавала паглядзець на інтэр’ер у сучасным беларускім стылі з саламяным павуком, слуцкім поясам, арнаментамі і вышыўкай.
Інтэр’ер у сучасным беларускім стылі. Фота: @h_kaspiarovich, Threads.com.
У сваім інстаграме беларуска падрабязней расказала пра ідэю праекта. Яна задалася пытаннем, ці існуе наогул сучасны беларускі стыль у інтэр’еры.
«Шчыра скажу, не бачыла, каб хтосьці праектаваў нешта падобнае… Значыцца, буду хэдлайнерам! А як інакш, калі да цябе прыходзяць кліенты са слуцкім поясам?»
Інтэр’ер у сучасным беларускім стылі. Фота: @h_kaspiarovich, Threads.com.
Што такое «сучасны беларускі стыль» у інтэр’еры?
Архітэктарка тлумачыць, што ў аснове такога інтэр’еру – «этнакод». Пры гэтым яна падкрэслівае, што ён не павінен кідацца ў вочы.
«Сучасны беларускі інтэр’ер нясе ў сабе этнакод. Але ён не крычыць, не б’е ў вочы, ён ціхенька праходзіць чырвонай нітачкай праз усю прастору.
Гэта месца, дзе, замест жырандолі пры ўваходзе, вісіць саламяны павук, які выконвае сваю функцыю – адпужвае злых духаў на парозе! Дзе ў вышыўцы пераплятаюцца ўзоры родных краёў. Дзе прысутнічаюць творы беларускіх мастакоў і творцаў. Дзе ў рэшце рэшт вісіць слуцкі пояс!
Пішу, а ў мяне слёзы коцяцца ад таго, якія ў мяне кліенты, якія запыты маюць і наколькі я магу спалучаць дзве мае любові ў адной працы – Беларусь і мастацтва», – расказала беларуска.
Інтэр’ер у сучасным беларускім стылі. Фота: @h_kaspiarovich, Threads.com.
Праект сапраўды рэалізуюць
У каментарыях пад допісам у Threads адна з карыстальніц спытала ў аўтаркі праекта, ці плануецца рэалізацыя такога інтэр’еру. Яна адказала, што праект не застанецца толькі візуалізацыяй: «Канешне! Ужо ва ўсю ідзе працэс».
Як адрэагавалі беларусы?
Судзячы па каментарыях у сацсетках, многім карыстальнікам такі інтэр’ер вельмі спадабаўся. Людзі пішуць, што ён выглядае сучасна і цікава. У абмеркаванні ўдзельнічаюць не толькі беларусы. У каментарыях таксама ёсць водгукі украінцаў, якія адзначаюць, што ім падабаюцца дэталі і агульная атмасфера.
«Гэта проста ваў. Стылёва, падкрэслівае нацыянальныя ноткі, але не перагружае», – напісала amplituda18.
«Дуже гарно! Мені не дає спокою та вишивка на шафах. Сподіваюсь, ця ідея мені колись знадобиться», – пахваліла ўкраінка з нікам kaplunphoto.
«Це дуже красиво. Не знала, що в Білорусі також є соломʼяні павуки!» – напісала hovoradlo.
«Прыгожае! Мяне вельмі зачапіла ідэя з фасадамі ў вітальні. Тэарэтычна можна было б розныя ўзоры рабіць час ад часу», – пракаментавала mila.doing.quack.
«Классный интерьер получился! Нравится интеграция не только беларуского дизайн-кода, но еще и мебели белдизайнеров, искусства. Впечатляет!» – напісала atoiraa.
«Гэта вельмі прыгожа. Спадзяюся калі-небуць зрабіць нешта ў падобным стылі ў сваім куточку», – падзялілася lana_bana_na_na_na.
«Вох! Ну зараз ёсць аб чым марыць! Прыгажосць і выдатны густ!» – лічыць alenalenux.
Перадрук матэрыялаў CityDog.io магчымы толькі з пісьмовага дазволу рэдакцыі. Падрабязнасці тут.
