13 студзеня праваабаронцы паведамілі, што суд у Брэсцкай вобласці вынес прысуд мужу і жонцы з Драгічынскага раёна – Дзмітрыю і Вользе Капузам. Іх прызналі вінаватымі па артыкулах аб «тэрарызме» і незаконным абыходжанні з боепрыпасамі і прызначылі ў агульнай складанасці 45 гадоў пазбаўлення волі.
Як паведамляюць праваабаронцы, Дзмітрыю прызначылі 24 гады калоніі, Вользе – 21 год. Таксама суд прызначыў абодвум буйныя штрафы.
36-гадовых сужэнцаў затрымалі 16 студзеня 2024 года. Яны родам з Драгічынскага раёна і жылі недалёка ад беларуска-ўкраінскай мяжы. Пасля затрымання на дзяржаўным тэлебачанні выйшаў прапагандысцкі ролік, у якім пару называлі «агентамі СБУ» і абвінавачвалі ў кантрабандзе з Украіны. Тады ж паведамлялася аб затрыманні групы з 12 чалавек.
У відэа сцвярджалася, што жыхары Драгічынскага раёна нібыта дапамагалі спецслужбам Украіны: забіралі ўзрыўчатку і рабілі тайнікі на тэрыторыі Беларусі. Таксама ў роліку паказалі момант затрымання Дзмітрыя: у яго было прастрэлена сцягно, пазней яго здымалі на мыліцах.
Мужа і жонку абвінавацілі па артыкуле 289 КК (акт тэрарызму) і па частцы 4 артыкула 295 КК (незаконныя дзеянні ў дачыненні да агнястрэльнай зброі, боепрыпасаў і выбуховых рэчываў). Сутнасць абвінавачанняў афіцыйна не раскрывалася. Суд адбываўся ў закрытым рэжыме.
Улетку 2025 года Дзмітрыя і Вольгу Капузаў занеслі ў афіцыйны «спіс тэрарыстаў».
Перадрук матэрыялаў CityDog.io магчымы толькі з пісьмовага дазволу рэдакцыі. Падрабязнасці тут.
